قصيدة: البت الرمت الطرحه .. ونشيد أكتوبر الأخضر

  (البت الرمت الطرحه)

                                                                

                                                                            

                                                       الحل فى الثوره .. الحل فى الثوره

الولد الحر والبنت الحره
يطلعو بره

الشعب الجائع للحريه

وشبعان بالحسره

وماسك لسه فى يدو الجمره

فى ناس حره وما لاقيه الكسره

فى ناس حره وغداها المويه الحاره

وحبة بصله
وبتحلى بتمره

وبرضو فى ناس بتفاوض!

آه يا حزبا نصو نظام

ونصو معارض

وسيدى وسيدك
واقفين عارض

 تسلم ايادى الساده

شغل (معارض)

سيدى وسيدك

 ادو تحيه ورفعوا تمام 

وكلام فى كلام

وكل حاجه 

تمام  .. وميه الميه

ما هميه ..

 انفصال، اغتصاب
ارهاب .. اباده جماعيه

وايه يعنى حلائب لما تزول
 من الخارطه السودانيه

وطوفان وسيول

ولقيط مجهول
حى أو مكتول

يا شعب أكتوبر والسادس من ابريل

يا أحفاد الشعب الثائر جيل ورا جيل

انسوا الوهم الحلم
(الحمل) الكاذب

الأسمو بديل راجنو

من زول شبعان، تريان، نديان

ومن يومو عميل

يا ثوار (كاودا) يا (فجر جديد)

يا شمسا شرقت يوم العيد

غير الشارع والف شهيد

مافى سبيل

واصلوا نضالكم واصلوا كفاحكم
 مسلح ومدنى

امكن يرجع لينا شليل

ايد فوق ايد

مع شعبا جائع للحريه

تجار الدين داسوه بالجزمه

وخلوهو ذليل

ناس بتموت بالسيل والمطره

وناس غرقانه فى بحر الهجره

وناس حار بيها دليل

وين سودان عشناهو جميل

نادوس خطفوه .. نادوس باعوه

نادوس سرقوه بليل

تجار الدين وكلاب الحاكم

والمأجورين

يا ناس (كاودا) و(فجر جديد)

بالأعلام لازم تهتموا 

والكلمه سلاح

تزلزل عرش الطاغية

وما ينوم مرتاح

تعرى الفاسد ليل وصباح

نظام خيبان نظام عريان

 من (.....) تحتو

ومربى اللحيه

نظام مشغول بى أميره الرمت الطرحه

أميره  البت السمحه الرمت الطرحه

وسبت تجار الدين
النهبو بلدنا وماسكين سبحه

بصقت فى وجه السرقوا الفرحه

اميره الحره

فى وش أخوها النائم
كشحت مويه 

عشان ما يصحى

يمرق الشارع وأهتف

يسقط يسقط تجار الدين

 يسقط  يسقط تجار الدين

الضبحو الوطن الغالى بالسكين

الجوعو زارع

قدميه مغروسات جوه الطين

الما ضاق راحه سنين وسنين

الأثقلو كاهلو بالهم والدين

العلو قصورهم من عرق المحتاجين

البارزه بطونهم من قوت المحرومين

الحل فى الثوره .. الحل فى الثوره

..............................

تاج السر حسين – كمبالا

 28 أغسطس 2013

*عمر البشير يتجاوز القضاء ويصدر عفواً عن مغتصب الطالبة الجامعية (ر.ح) الطالبة بجامعة بخت الرضا بعد ان قام بتخديرها، وجاء قرار العفو الرئاسي بموجب القرار الجمهورى رقم 206 لسنة 2013 اصدر رئيس الجمهورية عفوا رئاسيا علي المدان نور الهادى عباس نور الهادي والذي أدانته محكمة أول درجة تحت المادة 149 / من القانون الجنائى..

وكانت محكمة اول درجة أدانت الجانى تحت المادة 149/ من القانون الجنائى جريمة الاغتصاب ووقعت عليه عقوبة السجن لمدة عشرة سنوات، وقد تم تأييد الحُكم في كافة مراحل التقاضي حتي المحكمة الدستورية.

أغنية جديده: سلفنى ابتسامتك وأغنية بسمه

(سلفنى ابتسامتك)

ياالسامى ف مقامك

وهيبه رشيق قوامك

سلفنى ابتسامتك

وقليل من وسامتك

***

تنعش بيها روحى

وتخفف جروحى

يا راحتى وهناى

يا دموعى وبكاى

ويا كلمات غناى

***

مهما الناس يقولو

منو البقدر يطولو

سافر يا حليلو

وشال عقلى ودليلو

***

يا زولى القيافه

وفايت الناس مسافه

يا الذوق والرهافه

أتعبت المشاعر

وحيرت اللطافه

***

فى غيابك بعانى

دقائق أو ثوانى

ما انت النسائم

ولطيف المعانى

وأنت وحيد زمانك

ومنك مافى تانى

..................

تاج السر حسين - كمبالا

25/8/2013

قصده جديد: الم الفراق .. وأغنية الم الفراق

(قصيدة وأغنية ألم الفراق)

(الم الفراق)

هل تذكرين ..

يا رفيقة العمر النضر

عند ذاك المساء الحزين

لحظة اشهار الفراق بيننا

ومن يستطيع أن  يشاء غير ما تشائين

ومن اذا امرته عيناك لا يأتمر

لحظتها يا اميرتى

تساقط حزينا من اغصانه الزهر

وغادرتنى روحى مستاذنه لبرهة

وأنكسفت النجوم

وأنخسف القمر

وتثاءب الملاك

فلمحت اللألئ والدرر

وأدركت عندها يا (أننى)

ما تركت فى حناياك أثر

من قال أن الغوانى

يذبن فى ابيات شعر

أو عبارات الغزل

أدركت وقتها يا (أننى)

ما كنت حلم رؤاك ليلة

أو طيفا بخيالك قد عبر

أو رعشة عفوية

أو احساسا انثويا

أو فرحا منتظر

قد كان وهما عشته

وحدى

وقصرا من رمال بنيته

بيدى

فحطمته الأعاصير وهداه المطر

والأغنيات الحلوه تلك

والأمنيات الغاليه لك

كانت مثل غيم عابر

أو كلقاء حبيبين

دون موعد

 بل صدفة من صنع القدر

وكنتى دائما عندى ملاكا طاهرا

وكنت عندك من عوام البشر

لكنى يا ربيع حياتى  

ومنى العمر

يا ندى الورود فى الصباح الباكر

ويا عطر الصندل الذى احبه

ويا أريج الزهر

فى الليله تلك ..

 قبل أن تبوحى ونفترق

رمقت العيون الغوالى مليا

وأشبعت النظر

وسافرت بعيدا بعيدا

مع هيام ثغرك المثير

 ومع انسدال الشعر

اواه يا انت

بربك  اذا كان الفراق أختيارك

فلماذا تقتليننى بذلك الجمال الخطر

وعدت  للوراء

لسنوات البراءة والطفولة

ونسيت أوجاعى وأحزانى القديمه

واشياء أخر

وأكتفيت وأحتفيت بأنك امامى

لساعة من الزمان

بلا حجاب أو رقيب أو خفر

ومرت الثوانى فى عجل

ليت الزمان عاد من جديد

وجلست امام محرابك

فى أخر الصف أنتظر

اسمع لذات الحديث

ونفس القرار بمذاق أمر

فالشهد يا أميرتى أجوده

مأخوذ من مر الشجر

والعمر يا أميرتى كله لحظة

تتوقف احيانا وكثيرا تمر

هل تذكرين ..

يا رفيقة العمر النضر

عند ذاك المساء الحزين

ولحظة اشهار الفراق بيننا

ومن يستطيع أن  يشاء غير ما تشائين

ومن اذا امرته عيناك لا يأتمر

...................

تاج السر حسين – كمبالا

10/8/2013

الجرس والآذان .. وأغينة مدد لمحمد منير.

(الجرس والآذان)
فى وقت واحد
والعيون فرحانه 

تتأمل تشاهد
فى لحظة

 من عمر الزمان
رنت أجراس

 الكنائس
وأرتفع صوت

 الأذان
فى الكنائس 

فى المعابد

 فى المساجد
كل واحد 

عندو دينو
الا يبقى 

الرب واحد
شيخ بيدعى

 وبابا يهدى
واللى بتأمل

 وساجد
كل واحد 

عندو دين
ليه نفرق بين 

مسيحى 

ومسلمين
ربى الطف

 باليتامى

 وبى الغلابه

 البائسين
ربى لا تبقى

 ذليلا 

أو سجينا 

او محتاجين

***
لو نبينا يا محمد
لو حبيبنا يا محمد
جيت تنادى للمحبه 

وللتراحم والوئام
زى ما عيسى 

رسالتو عنوانها 

السلام
لو نبينا يا محمد
لو حبيينا يا محمد
لو رسولنا 

أخوهو عيسى
ليه نفرق بين 

مساجد 

وبين كنيسه
ليه نخلى الناس

 تعيش ايام تعيسه
الآله

 شرعو العداله
والمحبه 

جات بيها الرساله
لا مخاصمه

 لا عداوه

 لا ملامه
وليلة القدر

 بتنادى

                         بالسلام

 لى عيد قيامه
...............
تاج السر حسين