قصيدة : انت معى ولست معى .. وأغنية عيش معاى الحب!

أن أراك كل يوم أربعه وعشرين ساعة وأنت لست معى ؟ فى خيالاتى وصلاتى فى أناشيدى وأغنياتى فى موتى كل يوم وحياتى فى شرايينى وأنفاسى تسكنين وانت لست معى مبكرا تستيقظين يعم الخير وتصحو الورود وتشدو العصافير (الحنينه) ويضئ وجها كالقمر تتثأبين .... فتندلق قارورة العطر المميز والبرق المح والدرر وأنت لست معى !!! معا نرشف القهوة الصباحية ومعى تذهبين لدوامة العمل الكريه ما أقسى .. أن نبيع ونشترى ونحلف كاذبين معى تجادلين وأنت لست معى !! تقبلين وترفضين كالآخرين ... نعود للبيت الحزين - أعود وحدى - عيناى ترقبك تعدين الطعام تعاكسك خصلة الشعر المحرره .. (كالمستوطنات) أحكى اليك طرفة اليوم الجديد فتضحكين . . . نقتات من خبز الحروف شئ من الحلوى وأصنع من يدى الشاى (المنعنع) ثم نقرأ من الشعر الجميل ونسمع ذلك المغنى الشجى كى لا ننام نحن نخشى ضياع العمر واللحظات التى لا تعوض وأنت لست معى ندخل المنبر معا !! بأسمك الأول والأخير وتاريخ ميلاد أحتفى به فى كل يوم و(أقدم القدم اليمين) أحاور الأحرار والأخيار والأشرار والدخلاء والأدباء والشعراء والقابضين على الجمر بيد شريفه لا تلين وأحاور الداعين للرجوع للقديم للوراء أكثر من الف عام الواهمون الناشرون الظلم والتيه والظلام الحاملون (مشاعل النور) المزيف الذابحون الطفل ذاك الحلم المسمى بالسلام وانت لست معى يقبل الليل البهيم الغربه تقتلنى، تحولنى حطام
ماذا يعنى أن أراك كل يوم أربعه وعشرين ساعه ؟

25 رمضان عيد ميلاد غرة عينى (الحسين) بالتاريخ الهجرى وقصيدة ام الحسين

(ام الحسين)

الحسين

قصيدة (الحسين) التى بدأت كتابتها بالشارقه بعد ولادة ابنى (الحسين) بثلاثة ايام، ليلة 25 رمضان الموافق 9/12/2001 وأكتملت القصيده فى المدينه المنوره خلال أداء عمرة .. اليوم أكمل (الحسين) 15 عاما، بعد أن رفع رأسى في العام الماضى بحصوله على المركز الثانى لولاية الخرطوم في أمتحان الإنتقال من مرحلة الأساس للثانوى.
((الحسين))
الحسين ليلة القدر مولود 

ابوك (الختم) ومن (الختم) ممدود
رافع يديو للواحد المعبود

لا غنا لا شقا وراضى بالموجود
المال ان كتر وما بقتلو حدود 

يوديك لى طريقا مظلما مسدود
***
يا جد الحسين يا البيك بقالنا وجود
يا أم الرسول النورو كان موجود
فوق عرش الأله وفى آخر العنقود
يا ساكن الضريح يا أحمدا محمود
الدعاء يستجاب وللمدينه نعود
***
يا فجر الصباح يا الشاهد المشهود
يا شمس الغروب يا الغايب الموجود
تشملنا بشفاعتك وتفتح المسدود
***
يا أم (الحسين) يا أم الكرم والجود
يا الكرار على البيك الضعيف مسنود
الحسين شانو يعلى وفى زمانو يسود
للخيرات يسارع وبالمكارم يجود.

تاج السر حسين

قصيدة أعظم الشهداء .. ومدحة منى ليك سلام!

((المصطفي مني ليك سلام))

الى سيدى واستاذى - محمود محمد طه - أنبل الرجال وأعظم الشهداء, ذلك الشامخ الذى لم يتزحزح فى يوم من الأيام ، الى ذلك الأنسان الذى عرفت منه الثبات على المبدأ والأستماته فى الحق لكنى لم استطع أن أكن مسلما مسيحيا مثله، أكظم الغيظ وأدير خدى الأيسر لمن يلطم ألأيمن.

(أعظـــــم الشـــــهـــداء)

ثابت علــى المــــــبدأ
رهيب فى بسمتك تتحـــدى
لما القناع من هيبتك أنزاح
طرفك لا رمش لا أرتد
.........................................
مكتوف الأيادى 

واقف عديل ما أنهد
مجنزر، فى هيبة تقدل

شامخ فى السماء الممتد
بى صمتك حاكمــت الجهـــل

والحاكمـــوك بالــردة
................................
(أستاذ) العصـور 

سيرتك نقية وعطرة
للأحــرار منار 

وخــلدت أروع ذكــرى
حوضك صافى 

مافيهو مــوية عكــــــرة
أخجـلــت القــدام 

أهــل المديح والشكـرة
وأهديت الزمان 

(اسمى) وأعظم (فكره)
..................................
ترياق للنفوس 

من نشأتك، ولى آخر الأيام
افنيت العمـــر 

تبنى وتجدد وتنشرالأســـلام
بالفهم الصحيح 

والدعــوة والاعلام
أدواتك حروفك 

وسـلاحــك الأقـــلام
نظــراتك معــانــى

وحكم وكــــلام
فى صمتك عميق

ما بهمك الأعدام
وفى حزنك تأمــــل

ساكـن معـاك دوام
همـــك صـــلاح الكون

والـدنيا تبقى سلام
.........................
أتباعــك (رجــال) 

ثابـتـين دوام قـــــدام
طاهرين الأيادى

صادقين لسان وكرام
حافظين الوصية 

 دائما صيام وقيام
لو الموت ( شريعتك)

كان لاقوه فى (الاحرام)
........................
منو القبلك شهد 

بى روعتو الأعداء
مـنـــو المشى (للشنـق) 

وفــى بســـمه أتحدى
منو المشت النجوم 

فى دربو تستهدى
منو النزلت 

شمــــوس العـــــزة تتلقا
ثم أنزوت خلف السحاب

عشان اكتب 

سطر، اهداء
قليل لو قلنا 

فى وصفك عظيم
أو قلنا أنك

أعظم الشهـــــــداء

-----------------------

تاج السر حسين

قصيدة (شريفيه) .. وأغنية (سال من شعرها الذهب)

(سال من شعرها الذهب)

هذه القصيدة لحنها وغناها فنانا الشعبى (عبدالله البعيو) كتبت فى الصحفيه المصريه/ السودانيه (أسماء الحسينى) التى تمثل شريانا يربط بين البلدين فى كل الظروف.

(شريفيه) 

هى .. هى 

أسما هى

مشرقه ودائما وفيه

اسمى فى السودان (بهيه)

واسمى فى مصر الأبيه

(عزة) السودان اهى 

***

يا شريفيه .. وشريفه

يا كرم وأخلاق لطيفه

اسمى نسمه ويد عفيفه

أسمى بتنور صحيفه 

***

اسما هاك منى السلام والأحترام

يا راقيه فى نطق الحروف

ويا شاعرة فى نظم الكلام 

***
يا عامله لى خير الشعوب

يا داعية لى وقف الحروب

يا نخله من أرض الشمال

وضلها فى اقصى الجنوب.

تاج السر حسين

** شريفيه : لقب منحه لها السودانيون له مناسبته

حديثى لقناة المحور .. وقصيدة (رباح الصادق) ما تقولى واى !

قصيدة من كلمات الأستاذه/ رباح الصادق المهدى.

ما تقولي واي
يا الصرختك حرقت حشاي
يا ربي
لامتين اللقا
شان تنختم دمعة بكاي
شان ما نقاسي من اللي كاين في عمرنا
ولا نخاف من اللي جاي
شان نحن بنوت البلد.. نقدل
وانظم لي غناي
شان عزة ما يهينيوها
ساي
ما تقولي واي
ناديتي امك يا الحنينة
وامك الكاتمة القهر بتقول اضاير لي بلاي
ساموها ألوان العذاب
من الختان
حت قالوا عورة ومالا راي
يوم ولعت كانونا للكفتيرة شان ما تسوي شاي
شان تاكلي، شان تتعلمي،
كشوها مرة ومرتين
قالوا المناظر.. ما بتشرف ماها هاي
ما تقولي واي
ما تقولي للجلاد خلاص
في مشهدك هزيتي عرشه من الأساس
كم سوط موجه ليكي يا بت العزاز؟
ما تقولي واي
باكر يكون خطوي اللي جاي
غضبي المحكّر في عروقي
وصوت دواخلي يكون نداي
يطلع مفجّر يكنس القهر
الكريه..
يكسر كرابيجن بحسها في قفاي
ما تقولي واي
يا ربي قبال اللقا
نفتح طريق
نلفا الحريق
نمسح دموع عزة ونفيق
ننهي الكوابيس المقيلة في الفريق
يا ربي.. ما تخذل دعاي!

 
رباح الصادق

قصيدة لبنى (ست الرجال) .. وأغنية (الجريده) !!

"الجريدة"

(ست الرجال)

لما تاه البلد 

وأحتار دليلو

لبنى قالت كلاما

ما قدر راجل يقولو

لبنى وقفت مكان ولدا

قعد ما شد حيلو

لبنى شعت زى برق

ضوت بلد ما ضو ليلو

لسانك يسلم

شعبنا الصابر وبحلم

بالسلام شمال جنوب بننعم

وبلدنا يتلم

***

فى ديار عازه ومهيره

وعازه نوره

ونوره لبنى ومافى غيره

البنيه العاليه فوق

ومقامها سامى

عائز أكتب فيك غنايا

وأنت اكبر من حروفى ومن كلامى

قبل اشوفك كنت واقفه وراى معايا

وجوه احساسى وأمامى

يا السحابه الفوق سمايا

وليك بسجل اسمى آيات أحترامى

***

شن نقول فيك يا عنيده ويا شديده

يا البنيه الفوق تلالى

زى نجيماتنا البعيده

البنيه الحيه تقدل زى قصيده

دى البنيه الرافعه رأسنا 

وحالفه يوم ما تسلم أيده

***

دى البنيه الشامخه زى قمم الجبال

ودى الرقيقه السمره فايته الناس جمال

وهى البنيه الحطمت صنم الضلال

ودى البنيه الواجهت كل احتمال وأى احتمال

البنيه كلاما دوغرى (كلام رجال).

تاج السر حسين

قصيدة (سماح) .. وأغنية (كلمه).

(كلمة) 

(سمــــــــــــاح)

 
نور القمر ضو السما 

والكون سكن فى أنشراح

الورد فتح نما

والعطر أنساب وفاح

العصافير غردت

والحزن أتلاشى راح 

لما (السماح) ليك انتمى

وطل الصباح

* * *
طليتى يا ست (السماح) 

قبل المواعيد والزمن

وسكنتى فى جواى اماسى

والفه واحساس بالوطن

أصلو القدر ودانى ليك 

وفى عينيك بتهون محن

* * *
لما الورد بله الندى 

والحرف أصبح غنى 

والوتر رجع صدى

لما العيون المسهده 

نامت بتحلم بالحنان

والليل هدا

لما ألأحاسيس هدهده

الريد الجميل

والشوق وصل آخر مدى

شلت (السماح) منك فرح

واصلو (السماح) منك بدأ

تاج السر حسين