قصيدة: خيال الأميره وأغنية النهاية

(خيال الأميره)

يا حليلك 
ياهو حالك

ديمه مشغول بيها 
بالك

وديمه سارح فى 
خيالك

ولسه متخيل  
هلالك

فوق جبينك

زى عريس
 ليلة خميس

حقق مناهو

والقمر 
 آلق ضياهو

اتدلى نازل 
من سماهو

فى توب 
(قرمصيص)

مخلوق براهو

والحنه  سوداء
 زى حظ التعيس

رائعه نقشتها

والصندل الفواح 
شذاه عطر دنيتها

والشعر مجدول
 مكمل روعتها

والنجوم مبهورة
 شاركوا فرحتها

وقبلما تم 
رقصتها

الأميرة تعثرت
عين صابتها

وبى محنه 
مسكت يمينك 
وأتكت
بانت ملامح 
فتنتها

ولسه سارح
 فى عيونها 
وبسمتها

بكت العزيزه 
من رقتها

وسال العسل 
من دمعتها

ولما شعرت 
بألأمان

ضميتها بى 
لهفة وحنان

والنونة بانت 
زى زمان

لما عضت 
شفتها

***

فى اللحظه ديك

وأنا فى خيال

سارح مع ست 
الجمال

مالك على  
يا ستنا

بتقولى لى ..

مات الهنا

ولمتين بتتخيل
 دروب ح تلمنا

والليله مرت
 كم سنه ؟

عشناها فى غربه 
وعذاب

وكل انواع 
الضنى

***

والأميره 
  الشاغله بالك

وديمه سارح 
فى خيالك

لا بتسأل عن 
ظروفك

لا بتفكر يوم 
تشوفك

لا بتتذكر 
حروفك

لا الحكاوى ولا 
الغناوى
 ولا المنى

مالك على 
يا ستنا 

فى اللحظه 
ديك

وأنا لا هناك 
ولا هنا

بتقولى لى

عد الزمن 
والبينا راح

والله بعدك 
لا سكت الألم

ولا اندملت 
جراح

وأنا فى عيونك لسه 
شايف

نسمة أمل وبسمة 
سماح

ومهما الليالى
 يطول ضلامها

مصيرها يطويها
 الصباح

.............................

تاج السر حسين – كمبالا

الأثنين -  25/3/2013

كلمات جديده : ليه تخاف تسأل عليهو وأغنيةغيره

ليه تخاف؟

لما مشتاق لى عينيهو
ليه تخاف تسأل عليهو

وفى خيالك قدلتو

وخطوات مشيهو

 وديع مدلل كلما اتأملت فيهو

زاد عذابك وأغترابك

وزاد فى تيهو

...................

كيف اسيبك وأنت تتخلل دماى

كيف أخليك وأنت افراحى وهناى

وكنت دائما غاية آمالى ومناى

لا الزمن غير مشاعرى

ولا الفراق بدل هواى

..............

 يا هو حال الدنيا فينا

يقطع الريده وسنينه 

من زمن قيس والملوح

والجميل الراد بثينه

كل (عابره) وأى (ليلى)

عاشت الأيام حزينه

  دنيا تغدر بالأحبه

وديمه بالأفراح ضنينه

وكل محب عاش فى خيالو

وفى الفؤاد أحلام دفينه.

..........

تاج السر حسين

 كمبالا – 28/2/2013

قصيدة : مشاعر .. وأغنية كابلى زينه وعاجبانى.

(مشاعر)
يا مشاعر لا بترحمى قلبى يوم 

ولا بتقدرى انى شاعر
عذبو الريد والجمال

واصبح مسافر
زادو ذكرى 

وخصله من ليل الضفاير
يا مشاعر ..
موقدة زى لهب المجامر
وفايضه زى سيل الخواطر
هدى من موجك شويه 

وابعدينى عن المخاطر
اصلى عارف ..
حبى جارف
للعيون
واصلى عارف ..
لا فى زيها لا بكون
الا خايف !!
خايف اريد 

والريد عليها يفوت ، يهون
أو تكون
ست العيون
نبع الحنان
عرفت دروب الريد زمان
وبرضى خايف
من عواطفى
ومن كلاما
ومن سلاما
ومن صباحا شفتو طل

لما طلت ابتسامه
ولم ايدا تنوم فى أيدى

وتبقى للعاشقين علامه
يا مشاعر انهزمت

رفعت رايات السلامه
هاك قيادى
توهينى وطوفى بى

كل الدروب
يوم فى الشمال

ويوم فى الجنوب
ما المشاعر 

ما بتسيب فى الدنيا شاعر
حتى لو عايز يتوب

  فى مرة لو فكر يهاجر

.......................

تاج السر حسين

قصيدة : حب أنانى .. وأغنية السنين.

حب أنانى

_____

لو السنين
 من جديد
ترجع تعود

 تجمعنا
 تانى
نهد جدار الصمت
نجتاز الحدود
ومن جديد ..
تتفتح الساحات 
 ورود
يخضر زمانى

كنت أهديك
باقى عمرى

وكان رويتك
من حنانى

وما بسيبك
لإختيارك

حتى لو اصبح
 انانى

ما اختيارك

كان علي 
وعليك جانى

..............  

اصلى لما   
 بعدت عنك    
غصب عنى  
وكان بأيدك   
ما بيدى    
  بكل أمانه     
وما أظنك   
ترضى   
لى زولا   
 بريدك    
 بالمهانه    
وما بعاتبك    
أو الومك   
أو اقول   
كانت خيانه    
لما جاتنى    
رسالة منك    
فيها زول    
خاتاهو 
فى نفس    
المكانة    
الكنت فاكر    
وحدى فيها    

وأنت جنبى     
وما فى زول     
ابدا سوانا      

...........     

وأفترقنا ..
 يا لمر الأفتراق   
وأفترقنا ..
وحدى كنت    
بحس لهيب   
الإحتراق  
وانت
لا حسيتى غربة 
ولا حصل هماك 
       فراق       
      إفترقنا ..  
وما أظن 
فى يوم
 نسيتك
وكلما
     قبلت جيهة     
  شفت عينيك   
 ولقيتك    
فى كل بسمه   
 وأى نسمه    
وأى همسه   
 وأى غنوه     
وكل لحظه    
 بعيشه حلوه     

.............     

ومن جديد ..  
لو السنين    
 ترجع تعود      
 تجمعنا تانى      
نهد جدار     
الصمت     
نجتاز الحدود
ومن جديد     
تتفتح الساحات     
ورود    
يخضر زمانى    
كنت اهديك   
 باقى عمرى      
وكان رويتك     
 من حنانى      
وما بسيبك     
 لأختيارك      
حتى لو اصبح     
 أنانى.     
ما أختيارك     
كان علي     
 وعليك جانى.     

...............

تاج السر حسين

كمبالا 23/12/2012