((نحنا عاندنا الحقيقة))
والقدر
ما الحظ براهو
ما الحظ براهو
كان مناهو يكون معاك
وتمشى فى دربو وخطاهو
***
يحتويك بى كل حنانو
وتبقى ست ريدو وهناهو
عيونو فى عيونك تسافر
وديمه ناظرك فى سماهو
***
ما انت عمرو وأنت قدرو
وانت ريدو الأصطفاهو
لا هو شاف قبلك عيون
ولا اتلفت بعدك وراهو
***
يا حليل ايام سعيدة
والطريق الليك مشاهو
والخطابات الأنيقه
فيها كلمات من غناهو
والليالى الفيها ساهر
ينسى فى حروفك شقاهو
***
ديمه سارح فى خيالك
وديمه تطلعى فى رؤاهو
فى النسائم فى الغمائم
فى الورد الفاح شذاهو
نظره من عينيك عابره
تطفئ نارو تكون شفاهو
***
يا مؤدب يا مهذب
يا بداية كل رائع ومنتهاهو
لو يفتشو فى دواخلو
يلقو دمك زى دماهو
***
والبفارق يوم حبيبو
ببقى طائر راح جناهو
نحنا عاندنا الحقيقة
والقدر
ما الحظ براهو
ما الحظ براهو
................
تاج السر حسين
كمبالا – 17/7/2015
