((دموع بت عبد الرحيم))
ابكي يابنية
وزودي
الدمعات شوية
إمكن تتذكري
من الآف
الضحايا
ضحية
==
بتبكي
علي ابوك
معذورة
باين ما كلموك
وما قالوا ليك
الماتوا كم؟!
والطفشوا كم
والغرقوا كم
وإغتصبوا كم؟!
والجنوا كم؟!
ما كلموك
عن مجدي
كيفنو
اتظلم
لا المخلوع
علي امو حن
ولا شيخو
قلبو عليها
رق ولا رحم
==
ابكي يا بنية
وزودي
الدمعات شوية
امكن تتذكري
من الاف
الضحايا ضحية
وزي ما قالوا
جيرانا
(محال الدم
يصير ميه)
ما كلموك
يابنية
عن ناس
دفنوها حيه؟!
وما كلموك
عن القضية؟!
عن دارفور
ومنو القاتل
ومنو المأجور
ومنو المغرور
==
ما كلموك يابنية
عن شهداء
بالالاف
وفوق ميتين
زادوهم مية؟
نساء ورجال
عملوهم شية
ومافضل
غير ياكلو
كبادهم نية
لا رحموا صغار
لا خلوا سعية
==
ما كلموك
يا بنية
عن كرام الناس
عن شهداء
الحق والإخلاص
ابكي يابنية
وزودي
الدمعات شوية
كان تتذكري
من الآف
الضحايا ضحية
==
ابكي وازرفي
الدمع الثخين
ما كلموك
عن الشهداء
عن ثمانية
فوق عشرين
عن الكدرو
ورفيقو
ود الزين
عن الخلي ولدو
في بطن امو
لسه جنين
عن الحرموهو
فاتحة ابوهو
ود السيد
صلاح الدين
عن بلول
وعن كرار
وزميلنا
تاج الدين
عن الباقين
ديل ما كانوا
سودانيين؟
==
ديل ما ليهم
اهل
وما كانوا
بملوا العين
ده ياهو الدين؟!
ما كلموك
يا بنية
عن سرقة
وطن
عن التمكين
ما كلموك
عن الكلام الشين
==
كلاما ني
* اكسح امسح
ما تجيبو حي*
بتبكي علي
ابوك
وابوك
مرتاح
ومرطب
لا خازوق
لا مسمار
لا أتعذب
ما كلموك
يا بنية
وابوك يادوب
ما كمل سنتين
ما قالوا ليك
في رمضان
قبايل عيد
في ناس
دفنوها
في ساعتين؟!
ابكي
وزودي
الدمعات شوية
امكن تتذكري
من الآف
الضحايا ضحية
===
تاج السر حسين
