قصيدة (جودى) .. وأغنية (مرحبتين بلدنا حبابه)

                 (مرحبتين بلدنا حبابه)

(جودى)
جودى بالخير يا سحابه
هدهدى الياسمين ورشى

كل صحارينا وترابه
من رزازك بلى شوقنا 

ومن نداك أروى التعابه
.........................

أرمى ضلك للغلابه
للماسكين الطوارئ

وعاشو دنيانا وعذابه
للشربو الشاى وغنو

أحلى أنغام الربابه
كونى أفراحم وشيلى

من شوارعنا الكآبه
...........................

(جودى) فى لحظات غيابه

بائنه فى حروف الكتابه
فى الليالى الحلوه عامره

بالأمانى المستجابه
فى (قميرات) نوره ساطع

فى الحكاوى وفى الدعابه
............................

نورى الساحات وشيلى

من أحاسيسنا الرتابه
لونك الخمرى المعتق 

و(العنب) زاد الصبابه
شعرك الفائت حدودو 

زى سؤال من دون أجابه
(جودى) مزهوه ب (شبابه)
جودى مرحب يا حبابه
جودى أحلامنا وفرحنا 

(جودى) دنيانا وعذابه

.....................

تاج السر حسين

قصيدة (ساكن زحل) .. وأغنية (أشتقت ليك)

((اشتقت ليك))

((ساكن زحل))

ما هو هين .. لما ننساهو ف ثوانى
اصلو بين واصلو عمر الناس أمانى
واصلو كل الناس بتفرح

وبرضو بتقاسى وتعانى
الا منك مانى فاكر يوم اعانى
***
يوم لمحتك ويوم لمحت اللفته والتيه والخصل
قلت فى جواى بريدك وشلت ريدك فى المقل
كنت جنبى وماك بعيده، الا شفتك فى زحل
ولما رديتى السلام وبلا كلام حصل الحصل !
***
حصل .. رجعتى حرفى الكان شرد زمنا طويل
حصل .. زى القمر ضويتى ليل
حصل .. شفتك فرح وكتبت فيك المستحيل
***
كتبت فيك .. يا ست جمالا ما حصل
يا أحلى من طعم العسل
يا أقرب الناس لى عيونى
ويا الساكنه أبعد من زحل.

تاج السر حسين

رمية (أشتقت لى زولا) .. وأغنية (لى زمن بنادى)

((لي زمن بنادي)) 

أشتقت لى زولا زى العسل لثمــــو

الذوق الرفيع وكرم الخصال اسمو

التوب الحرير غار من حرير جسمو

الحنه والكبريت وقدلتو وبسمـــــــو

نســــــوك الوقار والروح وكت تسمو

لمتين تبارى هواو وهواك متين حسمو

جلـــت قدرتو الأبدع 

فى كمال رسمـــــــو

________

تاج السر حسين