قصة اغنية حاجة آمنة اتصبري

 حاجة آمنة اتصبري عقد الجلاد

 قصة الاغنية علي لسان كاتبها

 الشاعر عبد الوهاب هلاوي

الان ليست حاجة أمنه وحدها كل السودان محتاج يتصبر !!

أغنية "حجة آمنة اتصبري" قصتها شنو؟!

شاعر الأغنية عبد الوهاب هلاوي قال:

هذه الأغنية أسيرة إلى نفسي وأحبها جداً، لأنها ترجمة حرفية لفترة من حياتنا، وكل الصور والتفاصيل الواردة فيها أنا عشتها صورة صورة ولحظة بلحظة..

وقتها نحنا كنا أيتام بنعيش في كسلا، والدنا رحل في فترة مبكرة جداً من حياته ومن حياتنا..

نحنا خمسة إخوة، بنتين وثلاثة بنين.. تحمَّلت أمي العبء وحدها، فعشنا معها تلك الحياة بكل تفاصيلها..

دي القصيدة الوحيدة الممكن أقول انو ما كتبتها أنا كتبتها أمي.. بحياتها، سهرها، آلامها، حرمانها، دموعها..

القصيدة كتبتها في بحري بعد سنوات طويلة من تلك الأيام ومن رحيل أمي..

لقيت نفسي فجأة بمسك القلم وبستعيد ذكريات وأحداث كتيرة، وبديت أكتب.. وأذكر اني كتبتها دفعة واحدة، ولم أُعدل فيها ولا حرف..

وبعد يومين جاني عثمان النو، قريت ليهو القصيدة واندهشت لمن قال لي عايزها لفرقة عقد الجلاد..

وضع ليها اللحن شريف شرحبيل، وبعد فترة اتصلت بي الفرقة عشان أحضر أول تدشين للأغنية على المسرح..

شعرت في ذلك اليوم وكأن أمي كانت تجلس بجانبي.. لمن سمعتها لأول مرة حقيقةً بكيت، شفت بيتنا والحي الكنت فيهو، خارطة بيتنا بكل تفاصيله، حركة أمي..

افتكر انو نجاح الأغنية لأنها عبَّرت عن بيوت كتيرة وأمهات كتيرات...

كلمات الأغنية

يا حاجة آمنة اتصبري 

عارف الوجع في الجوف شديد 

عارفك كمان ما بتقدري..

جاهلك شكى وجاهلك بكى

في بيتك المِرق انتكى..

الشيء البِحيّر وما بِحيّر

مابيه يا حاجة الزكاة..

طلع الصباح لو ليك مراد

يا حجة ما تطلع شمس 

والليلة عندك زي أمس..

لسه الرويدي من الصباح 

يا حجة ما جاب ليك خبر..

كان جوفه زي جوف العيال 

من مدة ما لاقي الحجر..

الله على الزمن الحجر 

المابي بالصبر ينكري..

يا حاجة آمنة اتصبري...

سرحتي في هموم العيال 

كيفن يعملو مع الدروس..

وباقي الأمور الـ بالفلوس

واحد زمن داير رداء

واحد خلاص قلمو انكسر

زي ال تقول أكلو الصدأ  

يا حجة آمنة اتصبري...

هبشتي جاي هبشتي جاي

كان تلقي سكر بس محال..

باقي الرطيل الـ في الـكرت

يا حجة سفوهو العيال..

ويا حليل زمان وسنين زمان 

يا حجة لو تتذكري..

ومشيتي لي برج الحمام 

برجك صفيحتين ما بزيد..

مشيتي لي برج الحمام

كان تلقي ليك جوزاً جديد..

يمكن بعد طلع الصباح 

يغشاكِ زولاً يشتري..

وسمعتي صوت جاك من بعيد

وبعد قليل بابك ضرب..

سمعتي صوت جاك من بعيد 

شالِك تعب ختّاك تعب..

يا حجة ناس الموية جوك 

أصلو الشهر روَّح جري..

وبعد صراع وصراع طويل 

يا حجة بينك والمحال..

ما لقيتي في داك النهار 

شيتاً يجي ياكلو العيال..

حبة عدس ما بسوّي شي 

وينو البصل وينو اللحم..

حبة عجين ما بسوّي شي 

وينو الدقيق وينو الفحم..

لازمك كتير اتقدَّري

لازمك كتير اتقدَّري..

ياا حجة آمنة اتصبري...