* خلــق الجمــــال *

نَحْنُ نُبَشِّرُ بِعَالَمٍ جَدِيدٍ، ونَدْعُو الى سَبِيلِ تَحْقيقِهِ، ونَزْعَمُ أنَّا نَعْرِفُ ذَلِكَ السَّبِيلَ مَعْرِفَةً عَمَلِيَّةً.. امَّا ذَلِكَ العَالَمُ الجَّدِيدُ، فَهوَ عَالَمٌ يَسْكُنُهُ رِجَالٌ ونِسَاءٌ، أحْرَارٌ، قَدْ بَرِئَتْ صُدُورُهُم مِن الغِلِّ والحِقْدِ، وسَلِمَتْ عُقُولُهُم مِن السَّخَفِ والخُرَافَاتِ. الأستاذ محمود محمد طه

الاثنين، نوفمبر 18، 2013

قصيدة: سحر القوافى .. وأغنية زول بريدك زيى مافى

(سحر القوافى)

ما بشيل فى خاطرى منك

ما العمر اصبح قصير

وما فضل منه الكتير

ومافى زول عارف ظروفو

وأيه يكون بكره المصير

***

ما بشيل فى خاطرى منك مهما قلت

ومهما زاد غضبك ، غرورك وأنفعلت

لما بى احساسى بيك فى لحظه بحت

بكلمه عابره ما قدرت أخفيها عنك وأعترفت

***

ما بشيل فى خاطرى منك مهما دارت بى منافى

وما بعاتبك أو الومك أو اقول عنك مجافى

وما بغير ظنى فيك أو ابدل اعترافى

وكيف أسيبك يا مناى وأنت ملهم كل غناى

وفى عينيك سحر القوافى

........................................

تاج السر حسين – كمبالا

18/11/2013

الأحد، سبتمبر 15، 2013

قصيدة: لجيش غير وطني .. وأغنية يجوا عائدين

(قصيدة لجيش غير وطني) وأغنية "يجو عايدين" التي كانت تغني لجيش وطني

___________
(أرفع الأيادى)
أرفع الأيادى
يا الأسمك جيش بلادى
أرفع الأيادى
دوس على المبادئ
وما تخلى عندك دم
واصل نومك وما تهتم
ايه يعنى الفساد والظلم
وايه يعنى رفع الدعم
***
أرفع الأيادى
وأنت راضى
طالما (المشير)

مبسوط وراضى
ساند تجار الدين والأراضى
وطالما النهب (المصلح)

اصبح عادى
ايه يعنى الخراب والهدم
وأيه يعنى رفع الدعم
***
ارفع الأيادى
يا الأسمك جيش بلادى
أرفع الأيادى وأدى التمام
وخليك مع الزمن
ارفع الأيادى للنظام
واقبض التمن
أرفع الأيادى
اطعم اولادك الحرام
وحريقه فى الشعب والوطن
وايه يعنى رفع الدعم
***
ارفع الأيادى
يا الأسمك جيش بلادى
وأنسى شرف العسكريه
شارك بكل همه
فى الأنفصال

والأباده الجماعيه
أرفع الأيادى
وأدى التحيه
مهما اراقوا الدم
وايه يعنى رفع الدعم
...........................
تاج السر حسين – كمبالا
15 سبتمبر 2013

الجمعة، سبتمبر 06، 2013

قصيده: حبك والوطن .. وأغنية غربه وشوق

"حبك والوطن"

-------------

عينيك صحيح
عالم فسيح

وفالا حسن

فى سوادن
وكتين
يتوهن يغرودن

كتبن
بدايات القصائد
والغناء

مددن

الرؤى الممتدة
أبعد من
نهائيات الزمن

ولما
سرحن غرودن
سرح معاهن

خيال فنان
وشاعر
طول عمرو
راحل

لا التزم قيد
لا رسن

لكنو صابر

على الجراحات
والشجن

راجيك تخاطرى
لو عندك
ليهو خاطر
وصيتو ليك

لا تهمى
لا يصيبك حزن

حبك صحيح
سر اندفن
بين الضلوع
أتوهط سكن

وبعد الفراق

والأحتراق

مليون ميل
تمدد

(اهديتو)
للناس والوطن

ما أنت
والوطن الحزين

لابسين سواد

حاضنين بعض
وباكين سوه

على الكفاف
عايشين
سنين
غربه وعذاب

متحملين

فرقة حبيب
مكتول هوى

أواه ياوطنا
جريح
أضناه التعب

عطشان حنين
والنيل غريب
فى جوفو جارى
ومنو ابدا

ما روى

والليل كئيب
لا قمرو بان

لا نجمو سارى

وأنت
يا ست الحسان

ساكنه الضفاف
يا منبع الخير
والعفاف

بتكفكفى الدمعات
تتدارى
وصيتى ليك

ما تهمى
لا يصيبك حزن

بعد الفراق
والأحتراق
حبك

مليون ميل
تمدد

(اهديتو)
للناس والوطن

............

تاج السر حسين – كمبالا

6/9/2013

الخميس، أغسطس 29، 2013

قصيدة: البت الرمت الطرحه .. ونشيد أكتوبر الأخضر

(البت الرمت الطرحه)

الحل فى الثوره .. الحل فى الثوره

الولد الحر والبنت الحره
يطلعو بره

الشعب الجائع للحريه

وشبعان بالحسره

وماسك لسه فى يدو الجمره

فى ناس حره وما لاقيه الكسره

فى ناس حره وغداها المويه الحاره

وحبة بصله
وبتحلى بتمره

وبرضو فى ناس بتفاوض!

آه يا حزبا نصو نظام

ونصو معارض

وسيدى وسيدك
واقفين عارض

تسلم ايادى الساده

شغل (معارض)

سيدى وسيدك

ادو تحيه ورفعوا تمام

وكلام فى كلام

وكل حاجه

تمام .. وميه الميه

ما هميه ..

انفصال، اغتصاب
ارهاب .. اباده جماعيه

وايه يعنى حلائب لما تزول
من الخارطه السودانيه

وطوفان وسيول

ولقيط مجهول
حى أو مكتول

يا شعب أكتوبر والسادس من ابريل

يا أحفاد الشعب الثائر جيل ورا جيل

انسوا الوهم الحلم
(الحمل) الكاذب

الأسمو بديل راجنو

من زول شبعان، تريان، نديان

ومن يومو عميل

يا ثوار (كاودا) يا (فجر جديد)

يا شمسا شرقت يوم العيد

غير الشارع والف شهيد

مافى سبيل

واصلوا نضالكم واصلوا كفاحكم
مسلح ومدنى

امكن يرجع لينا شليل

ايد فوق ايد

مع شعبا جائع للحريه

تجار الدين داسوه بالجزمه

وخلوهو ذليل

ناس بتموت بالسيل والمطره

وناس غرقانه فى بحر الهجره

وناس حار بيها دليل

وين سودان عشناهو جميل

نادوس خطفوه .. نادوس باعوه

نادوس سرقوه بليل

تجار الدين وكلاب الحاكم

والمأجورين

يا ناس (كاودا) و(فجر جديد)

بالأعلام لازم تهتموا

والكلمه سلاح

تزلزل عرش الطاغية

وما ينوم مرتاح

تعرى الفاسد ليل وصباح

نظام خيبان نظام عريان

من (.....) تحتو

ومربى اللحيه

نظام مشغول بى أميره الرمت الطرحه

أميره البت السمحه الرمت الطرحه

وسبت تجار الدين
النهبو بلدنا وماسكين سبحه

بصقت فى وجه السرقوا الفرحه

اميره الحره

فى وش أخوها النائم
كشحت مويه

عشان ما يصحى

يمرق الشارع وأهتف

يسقط يسقط تجار الدين

الضبحو الوطن الغالى بالسكين

الجوعو زارع

قدميه مغروسات جوه الطين

الما ضاق راحه سنين وسنين

الأثقلو كاهلو بالهم والدين

العلو قصورهم من عرق المحتاجين

البارزه بطونهم من قوت المحرومين

الحل فى الثوره .. الحل فى الثوره

..............................

تاج السر حسين – كمبالا

28 أغسطس 2013

*عمر البشير يتجاوز القضاء ويصدر عفواً عن مغتصب الطالبة الجامعية (ر.ح) الطالبة بجامعة بخت الرضا بعد ان قام بتخديرها، وجاء قرار العفو الرئاسي بموجب القرار الجمهورى رقم 206 لسنة 2013 اصدر رئيس الجمهورية عفوا رئاسيا علي المدان نور الهادى عباس نور الهادي والذي أدانته محكمة أول درجة تحت المادة 149 / من القانون الجنائى..

وكانت محكمة اول درجة أدانت الجانى تحت المادة 149/ من القانون الجنائى جريمة الاغتصاب ووقعت عليه عقوبة السجن لمدة عشرة سنوات، وقد تم تأييد الحُكم في كافة مراحل التقاضي حتي المحكمة الدستورية.