قصيدة: زول بشبهك .. وأغنية الحزن النبيل

(زول بشبهك)

صادفت زول ذكرنى بيك
نفس الملامح والشبه
ولمحة غرور عاجبانى فيك
الخصله تائهة على الجبين
وياها العيون الحلوه ديك
اللفته والنظره المثيره
وروعتك وخطوات مشيك
ماخده منك حاجات كتيره
وحتى التفاصيل الصغيره
سرحت فيها ندهت ليك
وإنت لا بيك لا عليك
***
وبدون زعل أو إنفعال
أسف أنا ..
و سامحينى يا ست الدلال
لو تاني فى عينيك سرحت
ورجعت عاودت السؤال
ياخساره ما كنت إنت
وبائن سرح بى الخيال
أو إكون طيفك غشانى
أو أى إحساس وإحتمال
سمعت صوتك
 منساب حنين
"لمتين يارحال
لمتين بتعاند الحقيقه
ولسه دائر
فى مساراتها وطريقها
وياهو حالك
  لسه واقف
في محطات انتظارك
راجى الزمن يرجع يعود
بعد الرجوع أصبح محال
لمتين بعذب فيك حنينك
و لمتين 
 بتتغرب سنينك
ومافى زول حاسى بأنينك
وغير عيونها ماشائف جمال"
***
ياربيع عمرى وحياتي
يا صافيه يا نبع الذلال
الله لا وراك غربه
وفرقة عزيز أو إرتحال
ومنو اللي قال!!
الغربه بس تعنى السفر
وغياب سنين وفراق أهل
ومنو الرجع ومنو الرحل
***
الغربه ..
فى إحساس مسافر
ضل سكتو ما وصل
الغربه ..
فى سهر ليالى
لا نجوم فيها ولا قمر
الغربه ..
فى غيمه بتمر
وتعدي ما تنزل مطر
الغربه ..
فى حلم اندثر
وفي عشرة سنين
تمضي ما تترك أثر
............................
تاج السر حسين
نيروبى - كينيا 18/7/2014

مريم الحره وأغنية مسيحية

                         

                              مريم الحرة

((مريم الحره))

شوفوا مريم فى ثباتها

لا بلاهة ولا عباطه

زى اسد فى ساحه تقدل

وزى عريس وسط السباته

مريم العز والصلابه

عرت (اسلام) الخيابه

لبسوا قدامها الرحاطه

وقالوا رده واستتابه

***
يا اخوها وود ابوها

يا خساره

الرجاله والجساره

مافى مريم

وما فى دينها

فى الفراشات السجينه

فى البلد الزاد انينها

مريم ..  المنصوره  حره

ماسكه قى يدينها جمره

ميرى  تهتف فى سكاتها

ميرى تسأل

عن بلد اتلاشى ضائع

عن شعب رائع

علم الناس كيفن تثور

لمتين يا شعبى الرائع

 لغير الله بتخضع

وتتزله

ومتين زى نيلك  

تفيض تملاها شوارع

قدامك الشباب والطلبه

ووراهم احرار النخبه

لمتين بتأتى وتحبه

وتجار الدين فى وطنك

ما خلوا الحبه

***

يا بلادى يا مآذن حق تنادى

ويا كنائس دقى اجراس السلام

ابن عربى من زمان حسم القضيه

وقال كلام

و(الماعندو محبه ما عندو الحبه)

كلام قالوا ابن الفارض

والشريف محجوب بقول

((كل واحد عندو رأى كل واحد عندو دين))

وانتو وين

ووينو دينكم

لسه عايشين فى الظلام

تعلوا فى قصور الفساد

وتمصوا دم الكادحين

خلوا مريم فى سبيلها

وشوفوا شعبا كان عزيز

اليوم صبح مقهور وجائع

والنظام لم الحثاله

من كل ناصيه وكل شارع

وكل  (مائع) وأى صائع

والوطن الكان كبير

نصو هاجر ونصو ضائع

***

شوفوا مريم فى ثباتها

لا بلاهة ولا عباطه

زى اسد فى ساحه تقدل

وزى عريس وسط السباته

مريم العز والصلابه

عرت اسلام الخيابه

لبسوا قدامها الرحاطه

وقالوا رده واستتابه

.........................................

تاج السر حسين – كمبالا

7/6/2014

آه يا (ليلى) آه .. مهداة لروح شاعر الشعب (محجوب) وأغنية (حنبنيهو)

        ((حنبنيهو البنحلم ليهو يوماتي))

             

                  ((آه يا ليلي آه))

                                    

يا ليلى متين ..

 تشرق تطل شمس الصباح

ومتين تعود البسمه والأفراح

ومتين بلد ناسا عزاز يرتاح

لا حاكم لئيم لا رئيس سفاح

***

يا ليلى ما ناسيك

والله ما ناسيك

لو انت ناسيانى

ولو الظروف منعت

خطاى تصل

قدام هناك راجيك

وفى قامتك بشوف الحل

ترجع ليالى زمان

لا حسره لا أحزان

عيني فى عينيك

 ويدى فى ايديك

ونغنى للسودان

***

يا عازه آه

يا نوره آه

يا ليلى آه

أم الشهيد بتنوح

دمعاتا نازلات دم

وجوه الفؤاد مجروح

(يا كاتل الروح وين بتروح)

أم الشهيد بتنوح

كتلو الوليد يا ناس

بالسنكى والرصاص

لا رحمه لا احساس

***

كتلوه تجار دين

وأخوانو محبوسين

وعاد (الضلام) تانى

الخائن مع الجانى

اتصالحوا (الأخوان)

اتعانقوا الفاسدين

نسوا الخصام والبين

خايفين تروووح ..  دولة (التمكين)

خائفين يضيييع .. مال الحرام والطين

***

يا ليلى نان لمتين

كلاب مسعوره

فى جسد الوطن تنهش

ولمتين لبن الصغار ينغش

التور المدوعل (بالوثبه) هترش

سفاح شرابو دم شعبا نحيل وأغبش

والشيخ (الكبير) ..!!

 يا خساره على الكبير

أصبح لعبة فى يد (المشير)

وبلع كلامو دقش

يا ليلى متين اقنصادنا ينعش

ومتين حقول القمح تترش

ولمتين نيلنا مكتول بالعطش

***

يا ليلى ما ناسيك

 والله ما ناسيك

لو انت ناسيانى

ولو الظروف منعت

خطاى تصل

قدام هناك راجيك

وفى قامتك بشوف الحل

ترجع ليالى زمان

لا حسرة لا أحزان

عينى فى عينيك

وأيدى فى ايديك

ونغنى للسودان

..................................

تاج السر حسين – كمبالا

22  أبريل 2014

·        ليلى اشارة للسودان

·        الكلام البلعو الشيخ (الكبير) .. كلام الجعلى والغرابيه.

قصيدة: سر البسمه وأغنية غلطة

                                                         

 (سر البسمه)

 ورينى يا عمرى
 الحصل

وسبب السؤال 
سبب الزعل

لو الكلام 
القلتو ليك

وحياة عينيك 
ما كان غزل

كل الحصل

فى اللحظة ديك
 زاد شوقى ليك

وإحساسى بيك 
يا ريت يكون
عندك وصل

ما كنت فاكر 
الريده
 تتحول زعل

ولمن نويت
 تبعد وترحل

وتشيل معاك
 عمرى الفضل

دقائق قلال
 صبرا تمهل

ما انت عارف
 يا قمر

عينيك قدر
 مكتوب مسطر

ومن يوم 
عرفتك يا جميل

لما تزعل 
تبقى أجمل

يا عزيز الأصل

يا حلم العمر

أرجع تعال 
وسيب الدلال

ما إنت
 سر البسمه 
والريد والجمال

ارجع تعال

ترجع معاك
 ايام سعيده

أرجع تعال

أكتب معاى
 عنوان قصيده

ارجع تعال

 كلمنى عن
 حاجات بريده

كلمنى عنك
 يا أمير

كلمنى عن
 زعلك شويه

وأحكى عن
 عينيك كتير

كلمنى عن 
شعرك 
المسدل غزير

كلمنى عن 
صوتك الخافت 
مثير

كلمنى عن
إيديك عن 
ملمس حرير

لمن تسالم
 وتبتسم

فى رقة 
الطفل الغرير

ورينى يا عمرى
 المصير

وأيه الحصل

وسبب السؤال
 سبب الزعل

لو الكلام
 القلتو ليك

وحياة عينيك
 ما كان غزل

...............

تاج السر حسين – كمبالا

13/2/2014