قصيدة: زى زمان وأغنية لو بتلقى زول يحبك زينا

"زى زمان"

......
زى زمان
ويا حليل
ايام زمان

بى معزة
ونية صادقة

وإحترام

عائز أرسل

ليك سلام

وشوق شديد

وكتير حنان
الا خائف
تحسبى
الشوق إنهزام

وعائز

ابارك ليك

عيد
وبرضى خائف

تحسبى الريد

اللى كان

تانى فتق

من جديد

***

وزى زمان

عائز ارسل

ليك ورود

أو حروف

زاهية وانيقة

صورة فيها

إتنين حبائب

وجلسة فى

أجمل حديقة

الشمس

 يا دوبه راحله

وبكره بتعاود

 شروقه

إلا خائف

تانى ترجعى

لى غرورك

وأرجع اقبل

بالحقيقة

من زمان

أنا قلت ليك

لو قدرتي
في يوم نسيتى

برضو فتشى

لى طريقه

***

وزى زمان

كلما فكرت

أبعد

عن دروبك

وأمحى سيرتك

من خيالى

بلقى نفسى

رجعت ليك

وقدرما حاولت

أنساك واسيبك

ببقى تائه

فى عينيك

ولو حصل

صادفت حلوة

فى أى سكه
قلبي زاد
خفقانو جوه

وبلقى روحى

سرحت فيك

ولو سمعت

فى مرة غنيه

بفتكر

كتبوها ليك

والفراق لو

بينا طول

برضي بحلم

بى مجيك

***

يا حبيبة عمري
 وأكتر

مافى زول

فى الدنيا
بقدر
بى ايديهو

اختار وقرر
 قسمتو

وحظو ونصيبو

والمقدر

مهما يعمل

لازم يحصل

وبرضو فى

الآخر بصيبو

الا بس

لو حبو صادق

زولو ما بقدر

يسيبو

.......

تاج السر حسين

كمبالا

1/9/2017

قصيدة: نحنا عاندنا الحقيقة وأغنية بتتعلم من الايام

((نحنا عاندنا الحقيقة))

والقدر 
ما الحظ براهو

كان مناهو يكون معاك

وتمشى فى دربو وخطاهو

***

يحتويك بى كل حنانو

وتبقى ست ريدو وهناهو

عيونو فى عيونك تسافر

وديمه ناظرك فى سماهو

***

ما انت عمرو وأنت قدرو

وانت ريدو الأصطفاهو

لا هو شاف قبلك عيون

ولا اتلفت بعدك وراهو

***

يا حليل ايام سعيدة

والطريق الليك مشاهو

والخطابات الأنيقه

فيها كلمات من غناهو

والليالى الفيها ساهر

ينسى فى حروفك شقاهو

***

ديمه سارح فى خيالك

وديمه تطلعى فى رؤاهو

فى النسائم فى الغمائم

فى الورد الفاح شذاهو

نظره من عينيك عابره

تطفئ نارو تكون شفاهو

***

يا مؤدب يا مهذب

يا بداية كل رائع ومنتهاهو

لو يفتشو فى دواخلو

يلقو دمك زى دماهو

***

والبفارق يوم حبيبو

ببقى طائر راح جناهو

نحنا عاندنا الحقيقة

والقدر 
ما الحظ براهو

................

تاج السر حسين

كمبالا – 17/7/2015

قصيدة: قمحية وأغنية ياتو السمح؟

   
قمحية  

***  

حليل زمنا

جميل بالحيل

حليلك انت

يا بنية

***

بتذكر

أواخر ليل
كانت ليلة
صيفية

صباحا بدرى

دغشية
 جات من

برة

قمحية

بنية حليوة

زهرة ندية

زى القمرة

تضوى منيرة

***

جات قمحية

من برة

بنية شديدة

قائدة النسمه

فى ايدها

هائمة طبيعى

مبتسمه

نفس خطاها

والرسمه

قامة وهيبة

ماخده صفاتها

من إسمها

شن نعمل

مع القسمه

***

جات قمحية

من برة

بنية صبوحه

مهرة جموحه

تشبه روحها

مافى شبيهه

***

خطوة بخطوة

تتقدل

بشيش

فى مشيها

تتمهل

طبع ملكات

وكيف الملكة

تستعجل

أعاين فيها

وأتأمل

وأخاف أسأل

لوين
 ست البنات

ترحل

ووين توصل

حلاة قمحية

فوق ما اقول

واتخيل

***

جات  قمحية

من برة

خطوة بخطوة

رزانة وروقة

ماشه براها

واثقة

فى روحها

إلا تقول

جيوش

حارساها

لا هماها

زول قدامها

لا شغاله

بالبى وراها

***

خائلة الجبرة

فوق قمحية

زائدة حلاتها

طبع الملكة

معذورة

مهما بالغت

فى غرورها

***

جات قمحية

من برة

لا حيت

ولا أتلفتت

ولا وقفت

ولا نظرت

***

جات تتهادى

دغشية

أواخر ليل

صباح باكر

ياها الحالة

كنت مساهر

لا مودع

ولا مسافر

من الآخر

متين نامت

عوين شاعر

جات قمحية

فى هيئة

ملاك عابر

***

جات قمحية

من برة

رغم الدهشه

والفرح

الطفح غامر

رجعت أفتش

الماضى

وأعود من

تانى للحاضر

لا استغربت

لا اتحيرت

قبل ما اشوفها

كانت ساكنة

فى الخاطر

***

كانت ساكنه

فى الخاطر

وفى جواى

وفى كل 

الجميل نادر

بفتش ليها

يوماتى

فى الراجعين

من الغربة

وفى اليادوب

نوى يهاجر

***

جات قمحية

تتهادى

بنية شديدة

قايدة النسمه

فى ايدها

هائمة طبيعى

مبتسمة

قامة وهيبة

نفس خطاها

والرسمه

ماخده صفاتها

من إسمها

وشن نعمل

مع القسمه

***

حليل

زمنا جميل

بالحيل

حليلك

انت يا بنية

جات قمحية

من بره

أواخر ليل

فجرا بدرى

دغشية

----------

تاج السر حسين

كمبالا  17/7/2017