((اسال نفسك بينك وبينها))
حاول اتذكر حياتنا
وكيف حياتك من سنين
كنا وين .. والليله وين؟!
كنا فى عيونا بنشيلك
وكنت أكتر من حنين
كنت وافى وما بتجافى
وكنت فى ريدك أمين
يا خساره ..!!
كنت أجمل أغنياتنا
وكنا أجمل اغنياتك
كنت تحلف بى حياتنا
وكنا نحلف بى حياتك
وكنت تعتز بى صلاتنا
وكنا نعتز بى صلاتك
يا خساره ..!!
ما بنلومك
ما الزمن غدار وجاير
والمصالح هى البتحكم
فى المصاير
والعلاقات الندية
فارقت دفء المشاعر
يا خساره .. !!
ويا حليلك
لما كنا فى يوم نجيك
و لما كنت تجينا زاير
كنا بى فرحك بنفرح
ويا ما جانا الخير بشاير
كنا نتنسم عبيرك
ونشتل الساحات أزاهر
وكنا فى عينيك بنسرح
وكل أول ليهو آخر!!
........................
تاج السر حسين
ليست هناك تعليقات:
إرسال تعليق