((الفرعون واللف فى الفاضى))
___________________
لف يا زول ودور وحوم
اصلو الدنيا ما بتدوم
بعد الصين أمش تايوان
وأغشى معاك كمان تايلاند
وعوم فوق (المقلد) عوم
منو الراجى البلد ترتاح
معاك فى يوم
قسم بالله يكون زيك
أكيد موهوم
حوار زندية ولوى يدين
متين أنصف، حوار مظلوم؟
متين رجع، حقوق مهضوم
بدون تحلف تصر وشك
متل فرعون
أو زى الخلقت الكون
عليك با ئن لاك مرتاح
ولا عينيك بتعرف نوم
ده لو حال زول
غلط فى يوم
ماقاصد
(قضاء وقدر)
كتل ليو روح
وغلبو النوم
سواق بص
دقس لحظة
وغشاهو نعاس
تحت عجلاتو
مات الزول
وفى الكركون
طلع زيتو أبكباس
وصبح مهموم
كانت ليلتو ليلة عيد
لا فرح عيالو بلعبه
لا جاب للولية هدوم
وإنت كتلت كم مليون
عشان عينيك تعرف النوم
صغار النوبة
ونساء دارفور
وناس أدروب
لا خليت شمال لا جنوب
وفى سبتمبر الماضى
(عمن أول) قبل سنتين
قالوا الموت فات ميتين
يعنى الموت دخل الحوش
وصل (خرتوم)
وحتى الكانوا ديمه معاك
ناس أم دوم
لا خليت ولا أستنثيت
من القال يوم
نكير فى الموت ، بفرز كوم؟
حوار زندية ولوى يدين
متين أنصف، حوار مظلوم؟
متين رجع، حقوق مهضوم؟
منو الراجى البلد ترتاح
معاك فى يوم
قسم بالله يكون زيك
أكيد موهوم.
__________
تاج السر حسين
4/9/2015
ليست هناك تعليقات:
إرسال تعليق